2020年10月18日星期日

鞍山探索館抽扭蛋

事源係Facebook睇到鞍山探索館出左兩款新的扭蛋,本來想自己上去,拖左好幾日,襯星期日好天,天氣開始轉涼,帶埋兩個女上去,食完午飯就出發,其實可以坐車上去,不過就唔啱時間,唯有從錦英苑出發行上去,星期日,沿途都好多人行,細女嗌攰就抱下佢,去到燒烤場,雖然燒烤場封左,但隔離的遊樂場就無封,好多一家大細係度玩,俾兩個女玩一陣又再出發去探索館。

唔係好記得路程,由燒烤場再入原來俾想像中遠,自己行就還好,但帶住兩個女就唔同,佢地成日問幾時到,終於到了,其實位置就係村巴的總站,過橋再行樓梯就到,佢地突然好生猛咁帶頭行樓梯上。

上到去大家都攰,有枱有櫈就緊係除低口罩食野飲野,中途再去抽扭蛋,頂佢丫,我抽六次六次都係黃色頭盔,最後都可以換4個,算係儲齊一套,不過俾兩個女當玩具玩,返屋企我就收埋佢。之後仲買左D餐具紀念品。

去埋廁所,就預啱時間走人,下午四點三十分有班車,點知脫班,要搭五點果班,條隊排到好長,又要預留俾村民員工搭,數人頭,去到我地前面FULL晒,唉,如兩個女所願,行返出去燒烤場,飲飽食醉都行得幾快,係遊樂場俾佢地玩一陣就閃,因為總係有D人唔帶口罩,之後就係落山路,雖然唔係幾洗用力,但兩個女又開始嗌攰。因為宅左係屋企成半年,又唔洗上體育堂,間唔中先去下行山,嬌生慣養(我自己都係),最後去到錦英苑再搭小巴落新港城食飯。