2019年11月17日星期日

BBQ@馬鞍山郊野公園燒烤場

原本約定11月17日星期日到馬鞍山郊野公園燒野食,不過呢個星期因為好多地方都有堵路情況,尤其係吐露港封了好幾日,舅父係早幾日決定唔過黎,最後我地決定繼續,其實都好難決擇,因為大女要考試,雖然原先的星期四五都已經停課,但都要準備復課後的考試,但約好左就唔想取消,唯有我地上去先,等老婆同大女靜靜溫習。

到左星期六,留守中大的示威者陸陸續續離開,最後來回全線係中午前重開,我就叫媽咪通知舅父,睇下會唔會星期日照舊過黎燒。

星期日朝早,一起身當然睇下新聞,睇下最新的交通情況,之後就準備要帶上郊野公園的野,執下執下都一大袋,係裝滿Haglofs Lava 50的大袋。再晏D 收到電話舅父打黎話會出黎,睇下有咩要買,我地繼續執野,仲有媽媽一架買餸車的野食,加多幾袋野。之後就等細佬同佢女朋友上黎幫手拎野上山。

落到樓下等左陣,媽咪截到5人座的新界的上去,個仆街司機一味講話人地好早上去霸位,我地上去應該無晒位,又話上面塞死晒,去到大半就叫我地落車,自己拎野上去,正仆街,拎住D 野行多一段路,到左燒烤場,眼見燒烤爐都仲有,不過石枱就無晒,最後等左陣有人走就讓左張枱俾我地,無耐舅父都到埗,細女要我同佢玩,細佬透爐無耐,佢地開始燒野食。

燒左無耐,老婆傳來訊息,學校宣佈第一次考試取消,大女一定開心到飛起,老婆同佢即刻換衫上黎一齊玩,跟住之後收到電話,老婆話同大女行上黎。我燒多陣野食,就帶左細女行落山搵佢地,行行下有幾隻狗行埋黎,即刻一手抱起細女,佢地主要係聞下我地,上上落落都有其他人,D 狗又走去聞佢地。行到去一個涼亭度,見到老婆同大女,仲撞到瑞均(大女的同學)一家人黎行山,之後一齊行上去。大女上到去就玩玩玩,好彩有老婆同兩位叔叔同佢地玩,我就可以專心燒野食,因為二細佬一路都未到,所以我地燒下燒下都入夜,舅父等到二細佬到左坐多陣就走,我地就再燒多個幾鐘,大家食飽晒先落山,我同老婆同細佬同佢女朋友囉光管同電筒行落山,二細佬就車其他人落山先,之後再折返再車埋我地。




2019年11月10日星期日

香港童軍總會新界東地域20週年童行家樂徑籌款日 - 大尾督家樂徑

今日早上10點集合,時間唔算早,個個都精精神神出發,今次去大尾督家樂徑行,由馬鞍山去大尾督路程都唔短,但高速公路多,所以好快就到,細女今次無暈車浪。

到埗再集合派遊戲紙,都花左好多時間,因為有好多個團,所以要分批出發,船灣淡水湖主壩就去過好多次,但原來隔離有個家樂徑,就係斜路轉上主壩前行梯級上山,又係行一個圈同一位置離開。

上次圍水塘行一圈,無乜風景可言,今次有幾個觀景位,風景都好優美,路程又唔長,有上有落,好適合一家大細行,沿途要搜集資料答遊戲紙問題,因為有部份已經預先搵左答案,所以好快過左D Checkpoint,今次行得好快,嫲嫲又跟得上,行左一圈由入口離開,去左另一邊燒烤場集合,我就收返兩支行山杖,老婆同兩女就玩埋D 遊戲紙,齊晒人就坐旅遊巴回校,我地返屋企先沖涼休息,夜晚再出街食飯。











2019年11月1日星期五

親子旅行 - 獅子會自然教育中心

比平時仲要早到學校,不過等齊人都要過左九點先出發,來回都有旅遊巴接送,而且下午兩點就回程,唔會太疲倦。

呢個地方印像中好似未黎過,所以請假都要同細女黎接近下大自然,到埗後細女暈車浪仲未回復,雖然自己行,但全部地方都快快行過就算。之後仲話眼訓要媽咪抱。我就襯空檔四周圍睇下影下相。

因為無預訂飯盒,要係餐廳買,所以未到12 點就走入餐廳,細女狀態回復,係度同我玩手機,後尾先知要等到12點半先有飯賣,最後都早左D 老婆去買左兩個什扒飯,又幾好食,不過十分貴。

午飯過後,小朋友們係草地上玩皮球和追逐,簡簡單單已經不亦樂乎,好快又到兩點要搭旅遊巴回校。