同陽光玩遊戲

今日天氣比昨日更好，再帶兩姊妹落黎玩，果然星期日係比較多人，周圍轉地方踩，又玩遊樂場，小朋友的世界好簡單，有得玩就得。

我就走到陽光底下晒下，太陽光線十分柔和，好舒服，下次帶埋張露營椅黎嘆下~

見到咁的天氣就忍唔住手影相。

香港地呢D 天色好難得，再加上一至五要返工都無得享受。

做多些戶外活動

最近天氣轉涼了點，襯天氣好就帶兩個女去樓下踩單車，大女之前突然一試就識得踩單車，應該係玩過下平衡車的經驗令佢容易上手，學識左之後就自由自在地踩單車，十分享受，細女就玩平衡車，只要日子有功，應該都好快跟上家姐學懂踩單車的。

籃板彎成咁，即係唔使擦板。

早上人唔算多，可能是週六的關係。

天氣唔錯，間中仲會有陽光。

白芒遊樂BBQ

今日會去大嶼山白芒燒野食，果度有山有水，難得可以親親大自然，臨出發都係決定帶埋大機(DSLR) 去影相，呢次醒目搭的士去青衣再搭地鐵入東涌，約左細舅父車我地入白芒，雖然黎過好幾次，但係俾小朋友玩水都係第一次，細女有幾聲咳，所以唔俾佢落溪澗玩，淨係大女同叔叔舅公玩，我就週圍影下相，舅婆同太公約魚，寫意的一天。

大女玩完水返去屋外，太婆同屋主又清乾淨左個泳池仔，開始注水入去，俾兩個小朋友玩，起初只准細女濕下隻腳，唔可以濕身，後尾D水愈黎愈多，佢都無理浸埋個身入水玩，兩個小朋友玩得十分開心，大人們就開始燒野食，時間唔早，老婆幫佢地續一沖涼，再煮通粉俾佢地食，而我地都唔洗自己燒，太婆都用鐵網幫我地燒好，我就負責望實兩位小朋友。

因為第二日要返學，我地玩到接近七點就走人，細舅父車我地出東涌，我地再搭去青衣轉的士，好快返到屋企，執拾沖涼準備明天的工作日返學日，好日唔用大機(DSLR)影相，影完返屋企過相突然壞咭，搵返陳年的救相程式，好好彩救得返大部份相，只有兩張花左~