2019年9月26日星期四

小試iPhone 11 Pro Max上的超廣角(Ultra Wide)鏡頭

入手新手機iPhone 11 Pro Max都有一星期,真真正正試超廣角鏡頭的機會不多,襯得閒先搵D 景黎影下,都係屋企同公司附近多,就連單反我都係只有最闊16mm 的超廣角變焦鏡,今次iPhone 推出的係13mm,出黎的感覺係更加震撼,今日下午接大女放學前影多幾張,希望遲下有時間去影D 靚D 的風景。









2019年9月8日星期日

捉緊夏天的尾巴 - 清水灣二灘

之前的週未都落雨,無得去游水,八月尾又到兩位小姐彩排和表演跳舞,到左九月初終於好好天,今日訓到自然醒就開始執拾行裝,帶兩位小姐去沙灘玩,執完野換好衫,食左少少野就落樓CALL的士,無人覆但好彩截到綠的,由西貢方向去清水灣二灘。

路程都幾長,兩位小姐一個肚痛一個作嘔,好不容易才到埗清水灣二灘,其實司機都揸得好好,好彩兩位小姐落左車無耐就無事,放好個帳篷,老婆幫兩個女搽太陽油,我就去買左少少野食,食少少野就同大女出去浸下水,細女仲係好驚唔敢玩。






無耐細女都話想出去遊水,但隻腳唔掂沙,膽粗粗帶住兩個女落水,不過都係淺水區都玩下,細女一開始痴到我實,後尾開始放膽去玩,不過都要我扶住佢對腳,大女好叻,自己照顧自己,我只係周不時望下佢,天氣好好,陽光唔算最猛烈,後尾上返岸抖抖,佢地開始玩沙執石頭,細女無再驚沙,比起之前算好大進步,勇敢左好多。

之後細女要求再去玩水,大女跟埋去,呢次玩左好耐,都唔肯走,玩玩下細女要除水泡痴住我,大女就囉左個水泡邊游邊踢水,玩多左陣,時間差唔到,因為要返屋企沖涼再去嫲嫲度食飯,走的時候先後帶細女大女去廁所,之後到我去沖身換衫,搞掂晒收埋個帳篷就搭小巴去將軍澳,係Starbucks食左少少野,就再搭的士返屋企,分兩程搭,呢程紅的行高速公路多,兩位無再暈車浪,時間剛剛好,大家夠時間沖涼之後再去準時到嫲嫲度食飯。

2019年9月5日星期四

覆診執屋囉功課

一朝早起身趕去威記覆診,時間剛剛好,好快睇完就返康林,拎住一大袋野返去又要執一輪,無食早餐,返屋企時係樓下買左三件榚點,邊執邊食邊Backup web server,執完屋又有一袋野拎返錦英,又到午飯時間,搭火車去馬鞍山食飯,食完幫大女囉功課,之後返左錦英先再諗諗下午去邊。

囉功課途中見到藍天,忍唔住手影一影,今日其實只有短暫時間咁晴朗。

返到錦英,飯氣攻心訓左一陣,都係決定出一出去尖咀買衫,Patagonia新鋪開張會員有85折,坐巴士出去坐左成個鐘,去到K11 問客服,原來新鋪開左係新商場K11 MUSEA,第一次行,好昏暗好有格調咁,行左一個圈先搵到Patagonia,不過意外發現左間National Geographic 的鋪頭,對佢地個防水袋有意思,仲唔貴,不過最後都係無買,之後趕返馬鞍山食晚飯。

K11 MUSEA 其中一間精品模型鋪

K11 MUSEA 其中一間精品模型鋪