2019年8月25日 星期日

尋回二十年前的記憶

今日大女要去高山劇場彩排,我只係同朋友係好耐之前黎過一次,個環境係點個印象好模糊,只係記得大概位置係邊,明明預多左時間,坐的士去係九龍塘塞車塞到準時到達,衝忙間都唔知去邊度入,原來仲有新翼,後尾問左保安先知要去後台入口入,帶左大女上去交俾老師我就閃人。

期間有兩個小時空檔,冒住大雨我都離開高山劇場走去土瓜灣方向,因為我要搵返二十年前係土瓜灣返工食晏時經常去的一個商場,果度有間類似冒險樂園的遊戲中心,無後生仔玩,只有公公婆婆係度打𧄌,果時搵唔多錢一個月,我只會行商場,睇人玩,到後期我只會玩碌保零,因為搵到竅門可以打到好高分出多D票,一日最多玩一次,最後儲到少少票換下零食,不過係土瓜灣工作時間唔算好長,第一份工就係呢度做,不過做唔夠一年。

去到個商場真係廿年都無乜變,遊戲中心仲係度,當年的回憶一湧而上,但有無轉名我都唔記得,至於個碌保零就無左,其餘遊戲都同冒險樂園無乜分別,我依舊只睇不玩,不過今次影左幾張相。

除左呢個商場,仲記得北帝街好多野食,行過見到有間糖水鋪就坐低,食左個白果薏米腐竹,食完行兩步發現對面街有間冒險樂園,走左入去參觀下,二十年後,我已經變左呢類遊戲中心的忠實FANS,不過今次無玩,淨係換左個筆盒俾細女。之後就回程返去,好彩雨勢已經無咁大,因為無兜路,早左半個鐘返到去高山劇場,唯有打住機等大女放學。













沒有留言:

張貼留言