2019年12月26日 星期四

童躍廿載地域大露營開放 - 開心家庭童樂嘉年華@錦田鄉村俱樂部

因為學校裝修關係,集合地點約左係新港城街市門口,要一早出門口,大家都好頻能,好彩都準時趕到集合地點,無耐就係的士站出面街等旅遊巴,呢次分兩架車,無坐滿晒,路程都幾遠,目的地就係錦田鄉村俱樂部,上次家長教師會黎過一次,今次童軍搞o既,再黎睇下玩下。

到達時天氣好好,係周王二公書院附近影下相,之後經便母橋再入去錦田鄉村俱樂部,因為黎過,所以大部份地方都熟悉,不過今次活動的地方係再入D 的一片大草原,門口已經有個用竹造的牌坊,入到去左邊係各區的露營範圍,都擠滿左帳篷,右邊係大型帳篷,不同的工作單位佔用,再前D 有個更大的有蓋的地方有數個工作坊,小童軍們就係要係呢度進行不同的活動。

襯佢地排隊等候之際,我就四周圍睇下影下相,各區唔同的所屬營地,門口都有自己的設計,極盡心思,忍不住用手機全數影下,今日係佢地四天的露營尾二一天,見各位童軍仍然精力充沛,今個聖誕天氣又好好,佢地呢幾日的露營生活一定好正,今人羨慕不已。

玩左兩三個工作坊到,又係時候去食中午,無乜得選擇下,大家去食左豆腐花,三文治同公仔麵,食完兩位小朋友好快就話要玩其他遊戲,玩左渣車同灘位遊戲,又有精品禮物到手,之後再去玩埋其他工作坊,家姐玩果個用粒粒膠整圖案,整得太慢,又無心機整,之後我幫佢由頭做過,求其整左個ELSA牌仔,剛好用盡晒D 時間。玩完呢個工作坊都夠鐘集合閃人,我地去晒廁所就行返出去空地,集合後坐旅遊巴返馬鞍山去。













































2019年11月17日 星期日

BBQ@馬鞍山郊野公園燒烤場

原本約定11月17日星期日到馬鞍山郊野公園燒野食,不過呢個星期因為好多地方都有堵路情況,尤其係吐露港封了好幾日,舅父係早幾日決定唔過黎,最後我地決定繼續,其實都好難決擇,因為大女要考試,雖然原先的星期四五都已經停課,但都要準備復課後的考試,但約好左就唔想取消,唯有我地上去先,等老婆同大女靜靜溫習。

到左星期六,留守中大的示威者陸陸續續離開,最後來回全線係中午前重開,我就叫媽咪通知舅父,睇下會唔會星期日照舊過黎燒。

星期日朝早,一起身當然睇下新聞,睇下最新的交通情況,之後就準備要帶上郊野公園的野,執下執下都一大袋,係裝滿Haglofs Lava 50的大袋。再晏D 收到電話舅父打黎話會出黎,睇下有咩要買,我地繼續執野,仲有媽媽一架買餸車的野食,加多幾袋野。之後就等細佬同佢女朋友上黎幫手拎野上山。

落到樓下等左陣,媽咪截到5人座的新界的上去,個仆街司機一味講話人地好早上去霸位,我地上去應該無晒位,又話上面塞死晒,去到大半就叫我地落車,自己拎野上去,正仆街,拎住D 野行多一段路,到左燒烤場,眼見燒烤爐都仲有,不過石枱就無晒,最後等左陣有人走就讓左張枱俾我地,無耐舅父都到埗,細女要我同佢玩,細佬透爐無耐,佢地開始燒野食。

燒左無耐,老婆傳來訊息,學校宣佈第一次考試取消,大女一定開心到飛起,老婆同佢即刻換衫上黎一齊玩,跟住之後收到電話,老婆話同大女行上黎。我燒多陣野食,就帶左細女行落山搵佢地,行行下有幾隻狗行埋黎,即刻一手抱起細女,佢地主要係聞下我地,上上落落都有其他人,D 狗又走去聞佢地。行到去一個涼亭度,見到老婆同大女,仲撞到瑞均(大女的同學)一家人黎行山,之後一齊行上去。大女上到去就玩玩玩,好彩有老婆同兩位叔叔同佢地玩,我就可以專心燒野食,因為二細佬一路都未到,所以我地燒下燒下都入夜,舅父等到二細佬到左坐多陣就走,我地就再燒多個幾鐘,大家食飽晒先落山,我同老婆同細佬同佢女朋友囉光管同電筒行落山,二細佬就車其他人落山先,之後再折返再車埋我地。




2019年11月10日 星期日

香港童軍總會新界東地域20週年童行家樂徑籌款日 - 大尾督家樂徑

今日早上10點集合,時間唔算早,個個都精精神神出發,今次去大尾督家樂徑行,由馬鞍山去大尾督路程都唔短,但高速公路多,所以好快就到,細女今次無暈車浪。

到埗再集合派遊戲紙,都花左好多時間,因為有好多個團,所以要分批出發,船灣淡水湖主壩就去過好多次,但原來隔離有個家樂徑,就係斜路轉上主壩前行梯級上山,又係行一個圈同一位置離開。

上次圍水塘行一圈,無乜風景可言,今次有幾個觀景位,風景都好優美,路程又唔長,有上有落,好適合一家大細行,沿途要搜集資料答遊戲紙問題,因為有部份已經預先搵左答案,所以好快過左D Checkpoint,今次行得好快,嫲嫲又跟得上,行左一圈由入口離開,去左另一邊燒烤場集合,我就收返兩支行山杖,老婆同兩女就玩埋D 遊戲紙,齊晒人就坐旅遊巴回校,我地返屋企先沖涼休息,夜晚再出街食飯。